Kabutihang Naidulot at Suliraning Natamo sa Paggamit ng Social Media ng mga Mag-aaral Sa Filipino 8, Ikatlong Distrito ng Ubay, Bohol

Abstract

Sa modernong panahon, maraming kabataan ang nahuhumaling sa iba’t ibang uri ng social media tulad ng Facebook, Twitter, at Instagram. Bilang guro, ninais ng mananaliksik na masuri ang mga kabutihan at suliraning dulot ng paggamit ng social media sa mga mag-aaral ng ikawalong baitang sa Filipino sa Distrito ng Ubay. Ang pag-aaral na ito ay isinagawa gamit ang disenyo ng kwantitatibong pananaliksik, na may 185 na mga respondente mula sa limang mataas na paaralan sa Ikatlong Distrito ng Ubay para sa taong panuruan 2022–2023. Natukoy sa tulong ng weighted mean na nasa katamtamang antas ang paggamit ng social media ng mga mag-aaral. Ayon sa mga resulta, positibong nakakatulong ang social media sa pagkatuto ng mga mag-aaral sa Filipino, lalo na sa pagpapalawak ng bokabularyo at pag-unawa sa mga aralin. Gayunpaman, may mga suliraning dulot ang madalas na paggamit nito, tulad ng pagkadistrak mula sa pag-aaral at pagbaba ng atensyon. Sa pagsusuri gamit ang Spearman’s rho at chi-square, natukoy na may makabuluhang kaugnayan ang kasarian sa paraan ng paggamit ng social media, samantalang walang kaugnayan ang edad sa kabutihang naidudulot at mga suliraning natamo mula rito. Bukod dito, natuklasan sa t-test na may kaibahan sa kasarian sa paraan ng paggamit ng social media, kung saan mas madalas ang mga lalaki na gumamit nito para sa libangan kaysa sa pagkatuto. Samantalang pareho ang antas ng kabutihang naidudulot at mga suliraning nararanasan sa paggamit ng social media ng parehong kasarian. Ipinapakita ng pag-aaral na ang paggamit ng social media ay may potensyal sa pagpapabuti ng kasanayan sa asignaturang Filipino kung gagamitin ito nang maayos. Ang pag-aaral na ito ay nagmumungkahi ng mas matalinong pagpapasya sa paggamit ng social media, na maaaring maging instrumento sa mas mahusay na pagkatuto. Ipinapayo rin ang mga estratehiya upang mas epektibong magamit ang social media sa mga gawaing pampagkatuto ng mga mag-aaral sa Filipino.